አትላንታ ልዩ ነበር!!

ትናንት ቅዳሜ በአትላንታ ጆርጅያ የነበረው የመጽሃፍ ምረቃ በተሳካ ሁኔታ ተጠናቀቀ። የኮሚኒቲው ሊቀመንበር ካሊድ ዩኑስ ለኔ እንግዳ ሰው አልነበረም። ብዙዎች ልጆቻቸውን ይዘው መጡ። ልጆቹ "ኦሮሚያ" የሚል ህብረ ዜማ አስደመጡን። ሲጨርሱ ደማቅ ጭብጨባ አዳራሹን አደመቀው። የጀግናው ባለራእይ የባሮ ቱምሳ ባለቤት ወርቅነሽ መጥታ ነበር። ታሪክ ጸሃፊው ፕሮፌሰር መሃመድ ሃሰንም ነበር። ዶክተር አስፋው በየነም ነበር። ብዙ አንጋፋ ስዎች ነበሩ። ብዙ ቄሮም ነበር። ዶክተር መሃመድ መሳጭ ንግግር አደረገ።


እኔም አጭር ንግግር አደረግሁ።

ባጭሩ እንዲህ አልኩ፡

" 'ከመነሻው በኦሮሞ ጉዳይ ላይ ለመጻፍ ምን አነሳሳህ?' ብለው ሰዎች ደጋግመው ይጠይቁኛል። በውነቱ አላውቅም። ከመነሻውም ኦሮሞ ስለሆንኩ ሊሆን ይችላል።" ብዬ ምላሽ ሰጠሁ።

በንግግሬ መደምደሚያ ላይ ትንቢት ተናገርኩ፡

"የሚቀጥለው መጽሃፌ ምረቃ ቢሾፍቱ ላይ ይሆናል!!"

ጆሮ የሚያነድ ጭብጨባ አጀበኝ። ርግጥ ነው። መጪው ዘመን ራሱ ኦሮሞ ነው። መላ ሃበሾች ሊያውቁት የሚገባ እውነት አለ። "ጊዜው የደረሰን አሳብ ማቆም አይቻልም" ይባላል። መልካሙ ዜና የኦሮሞ ህዝብ ለመላ አፍሪቃ ቀንድ የሰላምና አብሮ የመኖር፥ የማህበራዊ ፍትህና የመቻቻል ምንጭ ሊሆን የመቻሉ እውነት ነው።